Апошні становіцца першым. Маркус Эрыксан стаў галоўным героем 500 міль Індыянапаліса і новым лідарам серыі IndyCar

0 2

Фота: indycar.com

Не, апошнім у IndyCar шведскі гоншчык Chip Ganassi Racing не быў. А вось у Формуле 1 быў. Вядома, дамагчыся нечага годнага ў складзе Caterham, Sauber і Alfa Romeo ў 2014-2018 гадах было цяжка, затое за акіянам Маркус можа цяпер поўнасцю раскрыць свой патэнцыял.

Апошні становіцца першым. Маркус Эрыксан стаў галоўным героем 500 міль Індыянапаліса і новым лідарам серыі IndyCar

Свае чалавечыя патэнцыялы не ў саўковай імперыі раскрылі многія краіны, што некалі ўваходзілі ў яе склад. Балтыйскія зрабілі гэта раней, бо ім пашанцавала болей, але, перахварэўшы непазбежнымі дзіцячымі хваробамі, пачала рабіцца сапраўды моцнай і незалежнай і Украіна. Менавіта гэтага ёй і не дараваў расійскі дыктатар, які вось ужо сто дзён катуе яе вайной.

Аднак за гэтыя сто дзён максімум, чаго дабіўся агрэсар – гэта часовы захоп тэрыторый. Захапіць жа мазгі ўкраінцаў і атруціць іх сваёй імперскай атрутай у яго не атрымалася. Украінцы свой цывілізацыйны выбар зрабілі, і цяпер гатовыя абараняць яго хоць са зброяй у руках, хоць без. Хаця абараняюць яны ўжо нешта большае: права на існавання сваёй і сваёй дзяржавы і само існаванне заходняй цывілізацыі.

І калі цывілізацыя хоча існаваць і квітнець далей, яна абавязаная без лішніх абмеркаванняў сярод палітычных махляроў даваць Украіне любую зброю. Украінцы справяцца і старой, але нашмат эфектыўней для іх будзе вызваляць сваю зямлю пры дапамозе сучаснай.

Тым больш што яна дапаможа і Беларусі, бо вызваленне Украіны будзе значыць і наша вызваленне, для якога шмат робяць нашы суайчыннікі, што зараз украінцам дапамагаюць. Пажадаем ім адкруціць галаву нашаму агульнаму ворагу. Слава Україні! Героям Слава! Верым! Можам! Пераможам! Жыве Беларусь!

Сваю падтрымку ўкраінскаму народу выражаюць і каманды амерыканскай формульнай серыі IndyCar, якія тыдзень таму паўдзельнічалі ў сто шостай у гісторыі гонцы Indy 500. 200-кругавая гонка на авале Старой Цаглярцы як заўсёды выдалася багатай на падзеі, у тым ліку на аварыі.

Адна з іх апроч іншых здарылася і з дэбютантам Рамэнам Гражанам – француз з каманды Andretti Autosport разбіў свой балід прыкладна на сярэдзіне дыстанцыі, калі лідар ужо дастатковая ясна выявіўся. Ім быў уладальнік поўлу, ветэран серыі з каманды Chip Ganassi Racing Скот Дзіксан. Лідзіраваў ён агулам дзевяноста пяць кругоў, але фінішаваў толькі дваццаць першым праз перавышэнне хуткасці на піт-лэйне штраф за гэта. Пабываў лідарам і яшчэ адзін прадстаўнік калектыву Чыпа Ганасі Алекс Палоў, які стартаваў другім. Але фінішаваць іспанцу ўдалася толькі восьмым.

Апошні становіцца першым. Маркус Эрыксан стаў галоўным героем 500 міль Індыянапаліса і новым лідарам серыі IndyCar

Абараніў жа гонар каманды Эрыксан. Гонку Маркус пачынаў пятым, і спачатку не здавалася, што ён яе і выйграе. Ў лідары швед выйшаў толькі на сто дзевяностым кругу, пасля паядынку з пераможцам Гран Пры Алабамы Патрысіа О’Вордам з Arrow McLaren SP. Мексіканец, зрэшты, пасля гэтага таксама не склаў зброю, павісшы ў Эрыксана ззаду. А партнёр Маркуса па яго камандзе Джымі Джонсан яго канкурэнту дапамог, разбіўшы свой балід на сто дзевяноста чацвёртым кругу.

Пасля гэтага інцыдэнту пелатон спачатку ўзначаліў аўтамабіль бяспекі, а за чатыры кругі да фінішу гонка наогул была спыненая чырвонымі сцягамі. Зразумела, усе адрывы былі нейтралізаваныя, што на апошніх двух кругах, калі заезд аднавіўся зялёнымі сцягамі, дазволіла О’Ворду ізноў пайсці ў атаку. Але Эрыксан люта адбіваўся і абараніў сваю трэцюю ў кар’еры ў IndyCar і першую на 500 мілях Індыянапаліса перамогу. О’Ворд фінішаваў другім, трэцяе месца заняў яшчэ адзін прадстаўнік Chip Ganassi Racing Тоні Канаан.

Гонка Indy 500 у IndyCar – падзея цэнтральная, таму і ачкоў за яе налічваецца багата. Эрыксан іх зарабіў ажно 109, што разам з няўдачамі канкурэнтаў, якія раней лідзіравалі ў чэмпіянаце, дазволіла яго ўзначаліць. Маркус зараз мае 226 балаў, на трынаццаць абганяючы О’Ворда, які падняўся на другую пазіцыю, і на чатырнаццаць Палоў, які апусціўся на трэцюю. Гоншчык Team Penske Уіл Паўэр лідзіраваў пасля папярэдняга этапу ў тым жа Індыянапалісе, але ў 500-мільнай гонцы фінішаваў толькі пятнаццатым і апусціўся на чацвёртую пазіцыю ў агульным заліку, дзе ў яго 202 ачкі.

Апошні становіцца першым. Маркус Эрыксан стаў галоўным героем 500 міль Індыянапаліса і новым лідарам серыі IndyCar

Наступны этап серыі IndyCar пройдзе ўжо ў гэтыя выхадныя на 2,35-мільнай (3,78-кіламетровай) гарадской трасе ў Дэтройце.

Источник

Оставьте ответ

Ваш электронный адрес не будет опубликован.