Лішні этап. Ці меў сэнс візіт серыі WTCR у Вугоршчыну?

0 2

Фота: fiawtcr.com

Трасу Хунгарарынг многія называюць Манака без бар’ераў. Яна не надта хуткасная, з павольнымі паваротамі, абганяць тут асабліва няма дзе. Але сусветныя гонкі сюды прыязджаюць, як у мінулыя выхадныя гэта зрабіў турынгавы Кубак свету.

Лішні этап. Ці меў сэнс візіт серыі WTCR у Вугоршчыну?

Траса, канечне, не вінаватая ў тым, што вугорскія палітычныя кіраўнікі аказаліся прадажнымі, і абралі ганьбу, а не падтрымку Украіны. За танныя газ і нафту яны гатовыя прадаць нават будучыню сваіх нашчадкаў, да якіх рускі свет абавязкова дайшоў бы, калі б не ўкраінцы, якія за свой выбар плацяць у тым ліку жыццямі дзяцей.

Вугорскі прэм’ер, відаць, забыўся пра 1956 год, калі рускі свет прыпёрся ў госці ў яго краіну. Ён дакладна не памятае пра перыяд Другой сусветнай вайны, калі яго папярэднікі былі паслугачамі Гітлера, і зараз наступае на тыя ж граблі. Карыстаючыся членствам Вугоршчыны у ЕС і NATO, ён абраў супрацоўніцтва з новым дыктатарам, цяпер ужо расійскім. Такая памылка можа занадта дорага каштаваць ужо вугорскім дзецям.

На шчасце, у свету ёсць Украіна, якая ўжо амаль чатыры месяцы не дае расійска-фашысцкім захопнікам рэалізаваць іх планы. Гераізм і мужнасць байцоў яе Узброеных сіл і простых грамадзян сталі прыкладам для ўсіх, і дзяржавы, якія адэкватна ацэньваюць становішча, як Чэхія, Славакія, Польшча, Літва, Латвія, Эстонія, Швецыя, Данія і шматлікія іншыя, дапамагаюць ёй і падтрымліваюць безумоўна.

Адначасова яны дапамагаюць вызваліцца ад дыктатуры беларусам. Лепшыя з іх зараз таксама змагаюцца на баку Украіны, каб наблізіць і перамогу беларусаў у іх змаганні, якое, насамрэч, пачалося задоўга да 2020 года. Мы з украінцамі можам жыць мірна і па-сяброўску, каб разам рабіць нашы краіны прыгожымі і шчаслівымі. Перамога над нашым агульным ворагам – неабходная ўмова для гэтага. Слава Україні! Героям Слава! Верым! Можам! Пераможам! Жыве Беларусь!

Беларускія спартоўцы ўжо расплачваюцца за саўдзел калгаснага ўзурпатара ў злачынствах супраць Украіны, і не могуць выступаць пад сваім сцягам, які, зрэшты, усё роўна даўно сімвалізуе не Беларусь, а дыктатуру. Расія яшчэ і пазбавілася Гран Пры Формулы 1, на месцы кіраўніцтва якой я б яшчэ падумаў, а ці патрэбны ёй Гран Пры Вугоршчыны.

Не, гонкі Вялікіх Прызоў на Хунгарарынгу цікавымі бывалі, але, у асноўным, калі пачынаўся дождж, як у мінулым годзе, напрыклад. Калі ж надвор’е было сухое, бачыць звычайна даводзілася прыкладна тое ж, што бачылі гледачы вугорскіх гонак WTCR, якія прайшлі ў мінулую нядзелю.

Гэта быў другі этап сезону, хаця першапачаткова мусіў быць трэцім. Таму што гонкі на легендарнай Нордшляйфэ, што мусілі адбыцца ў канцы мая, у апошні момант былі адмененыя па меркаваннях бяспекі. Арганізатараў непакоілі шыны, якія маглі не вытрымаць трох баявых кругоў па 20,8-кіламетровай трасе.

Лішні этап. Ці меў сэнс візіт серыі WTCR у Вугоршчыну?

Таму ўдзельнікі сусветнага Турынга атрымалі дадатковы адпачынак, і працягнулі сваю барацьбу на Хунгарарынгу. Праўда, праз згаданыя вышэй акалічнасці, можна было, як і ў Германіі, абмежавацца толькі кваліфікацыяй. Выйграў яе гоншчык BRC Hyundai N Squadra Corse Мікел Ацкона, пераможца другой гонкі першага этапу ў По. Усё, што яму заставалася ў першым заездзе ў нядзелю – гэта ўтрымаць ззаду канкурэнта з Comtoyou DHL Team Audi Sport Натанаэля Бертона.

З гэтым іспанец справіўся, і праз сямнаццаць кругоў атрымаў перамогу. Бертона жа на перадапошнім кругу памыліўся і дазволіў паспяхова атакаваць сябе двухразоваму і дзейснаму чэмпіёну WTCR Яну Эрлашэ з Cyan Racing Lynk & Co. Сам Натанаэль задаволіўся ў выніку трэцім месцам.

Лішні этап. Ці меў сэнс візіт серыі WTCR у Вугоршчыну?

Пра другую гонку расказаць наогул няма чаго. Адпаведна правілам рэверсіўнай стартавай рашотцы для першай дзясятцы па выніках кваліфікацыі, з першай пазіцыі яе пачынаў гоншчык Cyan Performance Lynk & Co Санцьяга Уруція, з другой чэмпіён WTCC 2014 года Роберт Хаф з Zengő Motorsport, з трэцяй – трыумфатар першай гонкі ў По Нэстар Жыраламі з All-Inkl.com Munnich Motorsport, чыю Honda Civic TCR узнагародзілі лішнімі кілаграмамі за той поспех.

Усё. У такім парадку першая тройка і фінішавала. Адзначыць можна хіба што барацьбу чатырохразовага чэмпіёна WTCC, напарніка і дзядзі Эрлашэ Івана Мюлера з напарнікам і суайчыннікам Жыраламі Эстэбанам Гер’еры у якую на дзясятым кругу ў першым павароце паспрабаваў умяшацца гоншчык Comtoyou Team Audi Sport Меді Бенані. Вынікам стала пашкоджаная аб Lynk & Co 03 TCR француза пярэдняя падвеска Audi RS3 LMS мараканца, які сышоў з дыстанцыі.

Датэрмінова гонку скончыў і мясцовы герой і напарнік Хафа Даніэль Надзь. Ён пацярпеў ад кантакту з Audi ветэрана і напарніка Бертона Тома Каранэля і Lynk & Co шведскага напарніка Уруціі Тэда Б’ёрка на сёмым кругу. На Cupra Leon Competición TCR вугорца зламалася задняе правае кола, што і не дазволіла яму фінішаваць.

Ацкона па выніках вугорскага этапу WTCR узначаліў яго асабісты залік, дзе ён мае 85 ачкоў, на дзесяць апярэджваючы Жыраламі, які перамясціўся на другую пазіцыю. На трэцюю падняўся Уруція, у якога 69 ачкоў. У камандным заліку All-Inkl.com Munnich Motorsport, якія маюць 132 балы, захавалі лідарства. BRC Hyundai N Squadra Corse у сваю чаргу засталіся другімі са 109 ачкамі, да пяці павялічыўшы адрыў ад Cyan Racing Lynk & Co, якія па-ранейшаму замыкаюць першую тройку.

Лішні этап. Ці меў сэнс візіт серыі WTCR у Вугоршчыну?

Наступны этап WTCR адбудзецца праз тыдзень, 25-26 чэрвеня на трасе Мотарлэнд Арагон у іспанскім Альканісе.

Источник

Оставьте ответ

Ваш электронный адрес не будет опубликован.