Правалы і прарывы мотакросавага Гран Пры Германіі

0 23

Фота: mxgp.com

Фартуна – дзеўка капрызная, гоншчыкі ведаюць гэта дакладна. Перамагчы і праваліцца ты можаш проста ў адзін дзень, як гэта ў нямецкім Тойчэнтале здарылася з Томам Віалем. А Цім Гайсэр, наадварот, вярнуўся на вяршыню подыуму.

Правалы і прарывы мотакросавага Гран Пры Германіі

На вялікі жаль, калектыўны Захад зрабіў шмат для таго, каб расійскі дыктатар паверыў у тое, што падпарадкаваў Фартуну сабе. Заходнія краіны праглынулі Крым, Данбас, як, фактычна, і збіты над ім пасажырскі рэйс MH17. Замест таго, каб паставіць дыктатара на месца так, як гэта спрабуюць зрабіць зараз, з ім працягнулі гандляваць і весці агульныя праекты.

У выніку 24 лютага 2022 года ён распачаў вайну, якая можа выявіцца Трэцяй сусветнай. І абавязкова выявіцца, калі Захад не будзе дапамагаць Украіне. Толькі дзякуючы ёй іклоў у пашчы фашысцкай пачвары за амаль што чатыры месяцы паменела. Агрэсар чакаў сустрэць слабае і няўмелае ўкраінскае войска, а сустрэў сапраўдных герояў, і не толькі вайскоўцаў. І нават не толькі ўкраінцаў.

Нашым суседзям і сябрам дапамагаюць дабравольцы з многіх краін, у тым ліку з нашай. Беларусы, якія зараз дапамагаюць украінцам, робяць важную гістарычную справу і для нас. Мясцовая калгасная дыктатура існуе пастолькі, паколькі існуе расійская кадэбэшная. Цяжкая ваенная параза апошняй будзе азначаць і смерць першай. Тое, што ў нас не атрымалася ў 2020 годзе на нашай зямлі, можа ў бліжэйшы час атрымацца на ўкраінскай. Слава Україні! Героям Слава! Верым! Можам! Пераможам! Жыве Беларусь!

Пра слізкіх нямецкіх палітыкаў ужо нараджаюцца анекдоты, але, на шчасце, нямецкае грамадства значна больш сталае. Звычайныя немцы разумеюць, што Украіна зараз абараняе і іх, і дарагія газ і паліва – не самая вялікая цана за прадухіленне сусветнай катастрофы. Таму гоначных свят немцы вартыя, і ўдзельнікі сусветнага мотакросу ў мінулыя выхадныя падарылі ім такое.

Правалы і прарывы мотакросавага Гран Пры Германіі

Святам для многіх аматараў MXGP стала вяртанне ў лад Рамэна Фэвра, які доўга аднаўляў здароўе пасля траўм і аперацый. А вось яго малады суайчыннік Максім Рэно, нажаль, наадварот, выбыў праз траўму ў кваліфікацыйнай гонцы. Спадзяемся, ненадоўга, хоць рэальнай пагрозы лідару чэмпіянату Ціму Гайсэру ён не ўяўляў, як і ўсе астатнія.

Затое ў малодшай катэгорыі MX2 усё было нашмат меней адназначна. Можна нават выкарыстаць штамп, што ў Тойчэнтале сезон стартаваў нанова. Гоншчык Red Bull KTM Factory Racing Том Віаль пачаў за здароўе, выйграўшы кваліфікацыйную гонку ў суботу, а потым і першую ў нядзелю.

Правалы і прарывы мотакросавага Гран Пры Германіі

Але хай сабе Яга Гіртс з Monster Energy Yamaha Factory Racing, у адрозненні ад француза, які выйграў хол-шот, стартаваў не ідэальна, але на дзявятым кругу, калі абагнаў свайго партнёра Цібольта Беністана, стаў галоўным пераследнікам Тома. Ціснуў на яго бельгіец да самага апошняга круга, на якім прымусіў памыліцца і пайшоў у атаку. Аднак Віаль адбіўся і захаваў першую пазіцыю. Гіртс у выніку фінішаваў другім, Беністан трэцім.

Вось на гэтым шанцаванне гоншчыка KTM фактычна і скончылася. Хіба што другую гонку ён таксама пачаў хол-шотам, але Беністан, які ізноў стартаваў удала, абагнаў яго на першым жа кругу. І добра бы ўсё было ў Віаля, калі гэтым для яго бы ўсё і абмежавалася. Сапраўдная драма здарылася крыху пазней, калі матор яго матацыкла заглух і адмовіўся заводзіцца, не дазволіўшы Тому працягнуць гонку.

Правалы і прарывы мотакросавага Гран Пры Германіі

Гіртс да таго моманту ўжо паспеў быў прарвацца на трэцюю пазіцыю, якая пасля зыходу Віаля стала другой, але Беністана не дагнаў – той перамог і ў заездзе, і на Гран Пры Германіі. Яга і гоншчык Big Van World MTX Kawasaki Мікель Хааруп фінішавалі другім і трэцім адпаведна, тыя ж месцы заняўшы і па выніках этапу ў Тойчэнтале.

Зрэшты, бельгійцу і гэтага хапіла, каб вярнуць сабе лідарства ў чэмпіянаце, дзе ў яго 460 ачкоў, на восем болей, чым у Віаля, які апусціўся на другую пазіцыю. Сімон Лангенфельдэр з Red Bull GasGas Factory Racing, які ў першай гонцы фінішаваў дзявятым, а ў другой чацвёртым, у турнірнай табліцы захаваў за сабой трэці радок і мае 353 ачкі. Аднак у заліку вытворцаў у MX2 Yamaha з 492 баламі засталася першай, хаця KTM скараціў адставанне да шасці ачкоў. GasGas, у якога гэтых ачкоў 405, застаўся трэцім.

Правалы і прарывы мотакросавага Гран Пры Германіі

Лідар чэмпіянату ў катэгорыі MXGP Цім Гайсэр ласкай Фартуны ў Германіі абдзелены не быў. Мацнейшым славенскі гоншчык завадской каманды Honda быў і ў кваліфікацыйнай гонцы, з перамогі пачаў і ў нядзелю, захапіўшы лідарства на самым старце. Камфортна яму было да самага фінішу, латвійскі гоншчык Standing Construct Husqvarna Factory Racing Паўльс Йонас, які ўвесь заезд правёў і скончыў на другой пазіцыі, яго не атакаваў.

Дый сам уціску з боку супернікаў пазбег – тыя вырашалі адносіны паміж сабой. Фэвр бліснуў яшчэ ў кваліфікацыйнай гонцы, у якой фінішаваў шостым. А на старце першага нядзельнага заезду апынуўся на трэцяй пазіцыі. Праўда, Джэрэмі Сівера з Monster Energy Yamaha Factory Racing гоншчык Kawasaki Racing Team MXGP стрымліваў толькі два кругі, але і чацвёртая пазіцыя на фінішы стала выдатным рэзультатам, улічваючы, што Рамэн прапусціў палову сезону.

Правалы і прарывы мотакросавага Гран Пры Германіі

Другая гонка склалася для яго не так удала – у ёй француз фінішаваў сёмым, што таксама, зрэшты, нядрэнна. Сівер жа стартаваў з хол-шотам і ўтрымаў першую пазіцыю да самага фінішу. Лёс другой пазіцыі таксама вырашыўся на першым кругу. На ёй спачатку апынуўся Гайсэр, яго атакаваў Хорхе Прада, але славенец хутка паспяхова контратакаваў і фінішаваў другім. Іспанскі гоншчык GasGas задаволіўся трэцяй пазіцыяй.

Трэцім Прада стаў і па выніках Гран Пры Германіі, Сівер заняў другое месца, Гайсэр перамог. Ну і ў чэмпіянаце сваё лідарства замацаваў – у яго 485 ачкоў, што на дзевяноста дзевяць болей чым у Сівера, які падняўся на другую пазіцыю. Прада па-ранейшаму трэці, у яго 366 балаў. Honda лідзіруе ў заліку вытворцаў з 492 ачкамі, Yamaha адстае на восем і застаецца другой, GasGas, у якога 395 балаў, трэці.

Правалы і прарывы мотакросавага Гран Пры Германіі

Пасля нямецкага этапу сусветны мотакрос узяў невялічкую паўзу, і ў гэтыя выхадныя адпачывае, як і яго ўдзельнікі. Але ў наступны ўік-энд, 24-26 чэрвеня, ён працягнецца ў Інданэзіі, Гран Пры якой пройдзе на трасе Сумбава Самота.

Источник

Оставьте ответ

Ваш электронный адрес не будет опубликован.